मुंबई | ‘महाराष्ट्रात भाजपच्या पक्षसंघटना बांधणीसाठी खूप कष्ट घेतले. मात्र, २०१४ पासून भाजपमध्ये छळ करण्यात आला. अडचणीच्या काळात राष्ट्रवादी काँग्रेसचे नेते शरद पवार यांनी मला विधान परिषदेत आमदारकी देऊन राजकीय विजनवासातून बाहेर काढले. यामुळे भाजपमध्ये पुन्हा जाण्याचा प्रश्नच निर्माण होत नाही’, असे राष्ट्रवादी काँग्रेसचे खान्देशातील ज्येष्ठ नेते आ. एकनाथ खडसे यांनी सोमवारी स्पष्ट केले.
भाजपचे विद्यमान राष्ट्रीय सरचिटणीस विनोद तावडे आणि आपण एकेकाळी भाजपचे अनेक वर्षे काम केले आहे. भाजपमध्ये तावडे यांचे योगदान मोठे आहे. कर्नाटकातील भाजपच्या पराभवानंतर जुन्या लोकांनी पक्षात परत यावे, असे तावडे यांना वाटले असेल. मात्र, आपण भाजपमध्ये जाणार नाही. राष्ट्रवादी काँग्रेसमध्येच काम करणार असल्याचे खडसे यांनी स्पष्ट केले. माझ्या पाठीमागे अनेक चौकश्यांचे शुक्लकाष्ठ लावण्यात आले. मात्र भ्रष्टाचाराचे गंभीर आरोप असलेल्या काही नेत्यांना भाजपमध्ये घेऊन स्वच्छ करण्यात आले, असा आरोप खडसे यांनी केला आहे.
‘तत्कालीन मुख्यमंत्री फडणवीस यांच्या काळात माझ्याकडे १२ खाती होती. ती आपणास कर्तृत्वाने मिळाली होती. या कालखंडात मुख्यमंत्रिपदाचा दावेदार मी होतो. फडणवीस यांनी ही खाती मला दिलेली नव्हती. तर परिस्थितीनुसार पक्षाने मला ती खाती दिली. भाजपने मला काहीच दिले नाही, असे मी कधीच बोललो नाही. पण भाजपमधील एक दोन जणांवर माझा राग आहे’, असे खडसे यांचे म्हणणे आहे.
देवेंद्र फडणवीस यांना भाजपचे प्रदेशाध्यक्ष करण्यासाठी त्यावेळी मी प्रयत्न केले. भाजपचे दिवंगत नेते गोपीनाथ मुंडे यांच्या आग्रहास्तव मी फडणवीस यांना अध्यक्षपद द्यायला लावले होते, असा दावा खडसे यांनी केला. ‘ज्यावेळेस भाजपमध्ये आमदार झालो. तेव्हा गिरीश महाजन भाजपमध्ये कुठेही नव्हते. सरपंच असताना त्यांना मी गल्लोगल्ली फिरविले. महाजन यांची कोणतीही प्रचाराची सभा माझ्याशिवाय झाली नाही. महाजन आता मोठे झाले असून, मुख्यमंत्रिपदाच्या शर्यतीत आहेत. फडणवीस यांचा वारसा म्हणून त्यांचे नाव पुढे यायला लागले आहे, असा दावाही खडसे यांनी केला आहे . # सत्यप्रभा न्यूज # नांदेड
