मुंबई : महाराष्ट्रात विधानसभा निवडणुकांची घोषणा करण्यात आली आहे. राज्यात २० नोव्हेंबर २०२४ रोजी एकाच टप्प्यात मतदान होणार आहे. तर २३ नोव्हेंबर रोजी मतमोजणी होऊन निवडणुकांचा निकाल जाहीर होईल. केंद्रीय निवडणूक आयोगाने दिल्लीत पत्रकार परिषद घेत विधानसभा निवडणुकांचीही घोषणा केली. त्यानंतर महाराष्ट्र नवनिर्माण सेनेचे अध्यक्ष राज ठाकरे यांनी ‘एक्स’वरुन प्रतिक्रिया दिली आहे.
“… पु. ल. देशपांडे म्हणायचे की जगात आता खूप कमी पाय उरलेत, ज्यांच्या पाया पडावंसं वाटेल… त्यातले एक भारताचा मानबिंदू रतन टाटा आपल्यातून निघून गेले. त्यांचा खूप स्नेह मला लाभला. आज असा एक माणूस आपल्यातून गेला. जगभरात लोकांना वाटून गेलं की आपल्यातला एक माणूस गेला, प्रत्येकाने हळहळ व्यक्त केली की चांगला, सज्जन माणूस गेला.” असं राज ठाकरे म्हणतात.
“प्रत्येकाला रतन टाटांच्यातला सभ्य, सरळ, प्रामाणिक माणूस आवडत होता. हे पाहून मला एक प्रश्न पडतो की जर रतन टाटांसारखा सभ्य, प्रामाणिक उद्योगपती लोकांना हवाहवासा वाटतो तर मग तुम्हाला सभ्य, सरळ राजकारणी का नको असतो?” असा सवाल राज ठाकरे यांनी विचारला आहे.
१३ ऑक्टोबर २०२४, मुंबईतील राज्यस्तरीय पदाधिकारी मेळाव्यात बोलताना राज ठाकरे यांनी हे प्रश्न विचारले होते. मात्र केंद्रीय निवडणूक आयोगाने पत्रकार परिषद घेऊन महाराष्ट्रात विधानसभा निवडणूक जाहीर केल्यानंतर अवघ्या काही मिनिटांतच मनसे अध्यक्ष राज ठाकरे यांनी आपल्या दोन दिवसांपूर्वीच्या भाषणातील एका मुद्द्याचा व्हिडिओ ट्वीट करत टायमिंग साधल्याची चर्चा आहे.
