नांदेड दि.१४: नांदेड महापालिकेने बांधलेल्या डॉ शंकरराव चव्हाण अभ्यासिका लोकार्पण सोहळा एका वेगळ्याच कारणाने चर्चेत आला. लोकार्पण सोहळ्याला आलेल्या एकत्र आलेल्या काँग्रेस कार्यकर्ते आणि माजी मुख्यमंत्री अशोक चव्हाण यांच्या समर्थकाकडून प्रचंड घोषणाबाजी करण्यात आली. दरम्यान, प्रोटोकॉल नुसार कोणशिलेवर नाव टाकण्यात न आल्याने काँग्रेस खासदार वसंत चव्हाण यांनी लोकार्पणानंतरच्या कार्यक्रमावर बहिष्कार घातला. या घोषणावाजीमुळे काही वेळ गोंधळ उडाला होता.
नांदेड महापालिकेच्या वतीने शहरातील स्वातंत्र्य सैनिक भागात मुला मुलींसाठी डॉ स्व. शंकरराव चव्हाण अभ्यासिका केंद्र उभारण्यात आले आहे. या अभ्यासिकेसाठी कोट्यावधी रुपये खर्च करण्यात आले आहे. रविवारी (१४ जुलै) माजी गृहमंत्री डॉ शंकरराव चव्हाण यांच्या जयंतीनिमित्त साधत महापालिकेने या अभ्यासिकेचा लोकार्पण आयोजित केला होता. माजी मुख्यमंत्री अशोक चव्हाण यांच्या हस्ते या अभ्यासिकेचे उद्घाटन करण्यात आले. यावेळी खासदार वसंत चव्हाण, खासदार डॉ अजित गोपछडे, आमदार बालाजी कल्याणकर, माजी आमदार अमर राजूरकर, महापालिकेचे माजी सभापती किशोर स्वामी, माजी महापौर शैलेजा स्वामी यांच्यासह इतर मान्यवरांची उपस्थिती होती. लोकसभा निवडणूकीनंतर माजी मुख्यमंत्री अशोक चव्हाण आणि काँग्रेस खासदार वसंत चव्हाण हे एकाच मंचावर येणार असल्याने कार्यक्रमाकडे सर्वांचे लक्ष लागले होते. दरम्यान, लोकार्पण सोहळ्याला दोन्ही खासदार एकत्र आल्यानंतर काँग्रेस कार्यकर्त्यांनी जोरदार घोषणाबाजी केली. त्यानंतर काही वेळानंतर चव्हाण समर्थकांनी देखील घोषणाबाजी केली. दरम्यान कोणशिलेवर नाव आणि बॅनर वर फोटो नसल्याने खासदार वसंत चव्हाण हे नाराज झाले. लोकार्पण सोहळ्यानंतर त्यांनी आपल्या कार्यकर्त्यांसह बहिष्कार घातला आणि तेथून ते निघून गेले.
राजकीय दबावापोटी महापालिकेने शिष्ठाचार पाळला नाही
डॉ शंकरराव चव्हाण अभ्यासिकेचा लोकार्पण सोहळा सुरुवातीपासून चर्चेत आणि वादाच्या भोवऱ्यात आला होता. सुरुवातीला महापालिकेने उद्घाटन पत्रिकेवर काँग्रेस खासदार वसंत चव्हाण यांचं नाव टाकले नाही. ही बाब लक्षात येताच खासदार वसंत चव्हाण यांनी जिल्हाधिकाऱ्याकडे तक्रार केली होती. त्यानंतर महापालिकेने दुरुस्ती करत पत्रिकेत खासदार वसंत चव्हाण यांचे नाव टाकले. प्रोटोकॉल नुसार उद्घाटन बॅनर आणि कोणशिलेवर नाव आणि फोटो टाकणे आवश्यक होते. पण, महापालिकेच्या खासदार चव्हाण यांचे नाव आणि फोटो टाकण्यात आले नाही, त्यामुळे वसंत चव्हाण यांनी नाराजी व्यक्त केली. राजकीय दबावापोटी पालिका प्रशासनाने शिष्ठाचार पाळला नाही, असा आरोप काँगेसचे खासदार वसंत चव्हाण यांनी केला. या प्रकरणी तक्रार करणार असल्याचे चव्हाण म्हणाले
कोणी घोषणाबाजी केली मला माहिती नाही
दरम्यान या घोषणाबाजीवर बोलण्यास माजी मुख्यमंत्री अशोक चव्हाण यांनी टाळले. काय प्रकार घडला आणि कोणी घोषणाबाजी केली मला काहीच माहिती नाही.ज्यांनी घोषणाबाजी केली, त्यांनाच विचारा असं म्हणत अशोक चव्हाण यांनी या विषयावर पडदा टाकला.
#सत्यप्रभा न्युज #नांदेड
![](https://www.satyaprabhanews.com/wp-content/uploads/2024/07/IMG_20240715_074439.jpg)