मुंबई : राज्याच्या राजकारणात एक मोठी घडामोड घडत असून उपमुख्यमंत्री एकनाथ शिंदे (Eknath Shinde)हे मनसे अध्यक्ष राज ठाकरेंच्या(Raj Thackeray) निवासस्थानी आले आहेत. यावेळी शिवतीर्थवर ते स्नेहभोजनाच्या कार्यक्रमासाठी येत आहेत. माहीम विधानसभा निवडणुकीनंतर राज ठाकरे आणि एकनाथ शिंदे यांच्यामध्ये दुरावा निर्माण झाल्याची चर्चा होती. तो राजकीय दुरावा संपवण्यासाठी एकनाथ शिंदे हे राज ठाकरेंची भेट घेत असल्याची चर्चा आहे. ही भेट मुंबई महापालिकेच्या निवडणुकीच्या पार्श्वभूमीवर महत्त्वाची मानली जात आहे.
उपमुख्यमंत्री एकनाथ शिंदे मनसे अध्यक्ष राज ठाकरेंच्या भेटीसाठी त्यांच्या निवासस्थानी म्हणजे शिवतीर्थवर आले आहेत. एकनाथ शिंदे आणि राज ठाकरेंच्या भेटीची ही पहिली वेळ नसली तर आजच्या भेटीला विशेष महत्त्व असेल. कारण विधानसभेत अमित ठाकरेविरोधात शिंदेंच्या शिवसेनेचे सदा सरवणकर रिंगणात उभे होते. सरणवकरांची उमेदवारी मागे घेण्यावरून एकनाथ शिंदे आणि राज ठाकरेंमध्ये राजकीय दुरावा निर्माण झाल्याची जोरदार चर्चा रंगली.
अमित ठाकरेंचा विधानसभेत पराभव झाला आणि त्यानंतर एकनाथ शिंदे हे राज ठाकरेंना पहिल्यांदाच भेटत आहेत. मुंबई महापालिकेसाठी राज ठाकरेंनी स्वबळाचा नारा दिला आहे. तसंच अटीशर्थींसह फडणवीसांना अप्रत्यक्ष पाठिंबा देखील जाहीर केला आहे. अशातच एकनाथ शिंदे आणि राज ठाकरे यांच्या भेटीत कोणती राजकीय समीकरण उदयास येतात याची महाराष्ट्राला नक्कीच उत्सुकता असेल.
एकनाथ शिंदे आणि राज ठाकरेंची ही भेट काही अचानक झालेली नाही. मनसे आणि शिंदेंच्या शिवसेनेकडून काही दिवसांपासून युतीवर चर्चा सुरू असल्याची माहिती सूत्रांनी दिली आहे. मुंबई महापालिकेच्या निवडणुकीसाठी ही युती करण्यासंदर्भात चर्चा सुरू असल्याची माहिती आहे.
मनसेला महायुतीसोबत कसे घेता येईल यावर महायुतीत चर्चा करण्यात आली आहे. भाजपचे मनसे सोबत आधीपासून एक वेगळे ट्युनिंग आहे. मात्र विधानसभा निवडणुकीनंतर सेनेचे आणि मनसेचे फारसे जमत नसल्याने सबंध सुधारण्यावर लक्ष केंद्रीत करण्यात आल्याची माहिती आहे.
मुंबईत मतांचे विभाजन होणे महायुतीला परवडणारे नाही. त्यामुळे एकनाथ शिंदे यांनी राज ठाकरेंची भेट घेतल्याची माहिती आहे. त्यासाठी मनसेकडून संदीप देशपांडे तर सेनेकडून उदय सामंत यांना प्राथमिक चर्चा करण्यासाठी नियुक्त करण्यात आले होते. काही दिवसांपूर्वी सकाळी जाऊन उदय सामंत (Uday Samant) यांनी राज ठाकरे यांची भेट घेतली होती.
मात्र जोपर्यंत ठाकरे आणि शिंदे एकमेकांशी भेटत नाहीत तोपर्यंत या युतीबद्दल अनिश्चितता होती. त्या पार्श्वभूमीवर एकनाथ शिंदे यांनी ही भेट घेतली.
.
