India vs Australia 2023 World Cup Final : 2023 च्या विश्वचषक स्पर्धेत ऑस्ट्रेलियाने भारताचा 6 गडी राखून पराभव केला. अहमदाबादच्या नरेंद्र मोदी स्टेडियमवर झालेल्या अंतिम सामन्यात भारताने ऑस्ट्रेलियाला केवळ 241 धावांचे लक्ष्य दिले होते. प्रत्युत्तरादाखल भारताने निश्चितपणे ऑस्ट्रेलियाला सुरुवातीचे धक्के दिले, परंतु ऑस्ट्रेलियाचे फलंदाज ट्रॅव्हिस हेड आणि मार्नस लॅबुशेन यांनी टीम इंडियाच्या सर्व आशा धुळीस मिळवल्या. ऑस्ट्रेलियाकडून ट्रॅव्हिस डेडने 137 धावांची शानदार खेळी केली. तर मार्नस लॅबुशेनने 58 धावांची नाबाद खेळी खेळली.
ट्रॅव्हीस हेड फायनला सामन्याचा अन् किंग कोहली ठरला वर्ल्डकपचा मानकरी
सेमीफायनलमध्ये सुद्धा ऑस्ट्रेलियासाठी ट्रॅव्हिस डेड विजयाचा शिल्पकार झाला होता. फायनलमध्येही टीम इंडियासाठी डोकेदुखी ठरला. त्याने केलेल्या 137 धावांच्या खेळीने सामनावीर ठरला.
किंग कोहली वर्ल्डकपचा मानकरी
संपूर्ण स्पर्धेत आपल्या फलंदाजीने धडकी भरवलेला किंग कोहली वर्ल्डकपचा मानकरी ठरला. आजच्या सामन्यातही त्याने दमदार अर्धशतकी खेळी केली, पण दुर्दैवीरित्या बाद झाला. संपूर्ण स्पर्धेत त्याने 765 धावांचा पाऊस पाडला. वर्ल्डकपच्या इतिहासात ही वैयक्तिक सर्वोच्च धावसंख्या आहे. त्याने तीन शतके आणि सहा अर्धशतके झळकावली. दुर्दैवाचा फेरा म्हणजे सचिन तेंडुलकरनेही 2003 मध्ये धावांचा पाऊस पाडताना वैयक्तिक सर्वाधिक 673 धावा केल्या होत्या, पण वर्ल्डकपमध्ये ऑस्ट्रेलियानेच अंतिम सामन्यात टीम इंडियाचा दारुण पराभव केला होता.
