सिल्लोडमध्ये दोन अल्पवयीन मुलींवर बलात्कार!; ३ नराधमांचे कृत्‍य

विजय पाटील
छत्रपती संभाजीनगर दि : २१ सिल्लोड तालुक्‍यात दोन अल्पवयीन मुलींवर बलात्‍कार करण्यात आल्याचा धक्कादायक प्रकार समोर आल्याने खळबळ उडाली आहे. लग्नाचे आमिष दाखवून एका १७ वर्षीय अल्पवयीन मुलीवर मित्रानेच बलात्‍कार केला, तर दुसऱ्या घटनेत १४ वर्षीय मुलीवर गावातीलच युवकाने बलात्‍कार करत कुणाला काही सांगितल्यास जीवे मारण्याची धमकी दिली. मुलगी गर्भवती राहिल्याने त्याचे बिंग फुटले.
पहिली घटना सिल्लोड तालुक्‍यातील अजिंठा पोलीस ठाण्याच्या हद्दीतील एका गावात समोर आली आहे. १७ वर्षीय मुलीवर मित्राने बलात्‍कार केला. दोघांच्या शरीरसंबंधाचा व्हिडीओ त्याच्या मित्राने बनवला होता. हाच व्हिडीओ दाखवून त्याच्या मित्रानेही तिच्याकडे शारीरिक सुखाची मागणी केली. मात्र तिने त्याला नकार दिला. त्यामुळे त्या नराधमाने व्हिडीओ व्हायरल केला. मुलीच्या तक्रारीवरून अजिंठा पोलिसांनी सोमीनाथ लक्ष्मण सोनवणे (वय २२) व योगेश मंगलमूर्ती वाघ (वय ३२, दोघे रा. उंडणगाव) यांच्याविरुद्ध गुन्हा दाखल केला आहे.
लग्नाचे आमिष दाखवून सोमीनाथने मुलीला २५ जुलै रोजी एका बांधकाम सुरू असलेल्या घरात नेले व तिथे तिच्यासोबत जबरदस्ती शारीरिक संबंध ठेवले. दोघांच्या शरीरसंबंधाचे सोमीनाथचा मित्र योगेशने मोबाइलमध्ये चित्रिकरण केले होते. हाच व्हिडीओ योगेशने मुलीला दाखवून माझ्यासोबतही तू शरीरसंबंध ठेव, अन्यथा व्हिडीओ सोशल मीडियावर व्हायरल करील, अशी धमकी मुलीला दिली.
मात्र, मुलीने योगेशला धुडकावून लावले. त्यामुळे योगेशने संतापून गुरुवारी (१९ सप्टेंबरला) रात्री ११.३० वाजता हा व्हिडीआे सोशल मीडियावर व्हायरल केला. यामुळे गावात खळबळ उडाली. या प्रकाराची माहिती मुलीने आई-वडिलांना दिली. त्यानंतर मुलीच्या मामाने अजिंठा पोलीस ठाणे गाठून तक्रार नोंदविली. पोलिसांनी सोमीनाथ आणि त्याच्या मित्राविरुद्ध शुक्रवारी (२० सप्टेंबर) सायंकाळी गुन्हा दाखल केला आहे. अधिक तपास केला जात आहे.
दुसऱ्या घटनेत सिल्लोड तालुक्‍यातील अंधारी येथील सुभाष सोनाजी पांडव या युवकाने १४ वर्षीय मुलीवर वारंवार बलात्‍कार केला. याबाबत कोणाला काही सांगितल्यास जीवे मारण्याची धमकी तो देत होता. त्यामुळे भीतीपोटी मुलीने कोणाला काही सांगितले नव्हते. मात्र ती गर्भवती राहिल्याने बिंग फुटले. त्यानंतर मुलीच्या तक्रारीवरून सिल्लोड ग्रामीण पोलिसांनी सुभाषविरुद्ध गुन्हा दाखल केला आहे. अधिक तपास पोलीस करत आहेत.
#सत्यप्रभा न्यूज # छत्रपती संभाजी नगर