नांदेडला मुसळधार पावसाने झोडपलं, ७ मंडळात अतिवृष्टी; पूर आल्याने गावांचा संपर्क तुटला

नांदेड: पाच दिवसाच्या विश्रांतीनंतर नांदेड शहरासह जिल्हयाला पावसाने पुन्हा झोडपले आहे. बुधवारी मध्यरात्री पासून पावसाची संतताधर सुरू असून मागील २४ तासात ३१ मिलीमीटर इतका पाऊस झाला आहे. तर सात मंडळात अतिवृष्टी झाली आहे. किनवट तालुक्यातील नाल्यांना पूर आल्याने अनेक गावांचा संपर्क तुटला आहे. गुरुवारी दुपारी किनवटमधील बेलोरी नाल्यावरून एक जण वाहून गेला आहे.
नांदेड जिल्ह्यातील बिलोली तालुक्यातील एक, भोकर तालुक्यातील एक आणि किनवट तालुक्यातील ५ अशा एकूण ७ मंडळामध्ये अतिवृष्टीची नोंद झालेली आहे. मौ सिंगारवाडी आणि सुगागुंडा गावालगत असलेल्या पुलावरुन पाणी जात असल्यामुळे दोन्ही गावांचा संपर्क तुटला आहे. किनवट तालुक्यातील आप्पारावपेठ ते गोडजेवली, मलकाजम ते शिवणी, आप्पारावपेठ ते मलकाजम, गोडजेवली ते दयाळ धानोरा, शिवणी ते दयाळ धानोरा हा रोड पाण्यामुळे बंद आहे. दरम्यान मुखेड, उमरी, नायगाव, बिलोली, अर्धापूर, लोहा, कंधार, भोकर, हिमायतनगर याशिवाय नांदेड, मुदखेड, देगलुर, उमरी, माहूर मध्ये रात्री पासून पावसाची रिपरिप सुरु आहे. धर्माबाद तालुक्यातील बन्नाळी येथे अति पावसामुळे ६० ते ७० कुटुंबाचे दोन बसेस द्वारे धर्माबाद येथील जिल्हा परिषद शाळेमध्ये स्थलांतर करण्यात आल्याची माहिती आहे. पुराच्या पाण्याच्या प्रवाहात एक जण गेला वाहून
जिल्हयातील किनवट तालुक्यात बुधवारी रात्रीपासून मुसळधार पाऊस सुरू आहे . त्यामुळे नदीनाल्यांना पूर आला आहे. बेलोरी गावाकडे जाणाऱ्या मार्गावरील नाल्याला देखील पुर आला आहे. नाल्यावरील पुलावरून पाणी वाहत असून त्याच पाण्यातून जाण्याचे धाडस काही गावकरी करत आहेत . पुलाच्या पाण्यातून जातांना बेलोरी येथील ४० वर्षीय अशोक दोनेवार हा व्यक्ती पाण्याच्या प्रवाहासोबत वाहून गेला. विशेष म्हणजे तिथे उपस्थित असलेले काही तरुण या पाण्यातून जाण्यास मज्जाव करत होते. पण त्यांचं न ऐकता हा व्यक्ती गेला आणि नाल्याच्या पुरात वाहून गेला. हा सगळा प्रकार एकाने मोबाईल मध्ये कैद केला आहे. वाहून गेलेल्या व्यक्तीचा शोध सुरू आहे . # सत्यप्रभा न्यूज # नांदेड