मुंबई- आपल्या उत्कृष्ट अभिनयाने प्रेक्षकांना वेड लावणाऱ्या आणि आपल्या विनोदाच्या जबरदस्त टायमिंगने प्रेक्षकांना खदखदून हसवणाऱ्या मराठी चित्रपटसृष्टीतील अशोक सराफ या अवलिया कलाकाराला कोण नाही ओळखत? मराठी चित्रपटसृष्टीत ‘मामा’ म्हणून ओळखले जाणारे अशोक सराफ आजही प्रेक्षकांच्या हृदयावर अधिराज्य करत आहेत. पण अनेकांना हा प्रश्न पडतो की अखेर अशोक यांना मामा बोलायची प्रथा नक्की सुरू तरी कुठून झाली. आज आम्ही तुम्हाला याचाच एक धम्माल किस्सा सांगणार आहोत.
अशोक यांना का म्हणतात मामा
अशोक सराफ यांचा मामा म्हणूनच उल्लेख केला जातो. ते म्हणतात, ‘या क्षेत्रात ‘मामा’ बनलो त्याचाही एक किस्सा आहे. आधी सगळे अशोकजी म्हणायचे; पण सेटवर मोठ्या संख्येनं असलेल्या कोल्हापूरकडच्या कामगारांना ते म्हणणं अवघडल्यासारखं व्हायचं. एकदा एका कॅमेरामनची मुलगी सेटवर आली असताना, ‘हे अशोकमामा’, अशी ओळख त्यानं करून दिली. दोन-तीन दिवसांनी तोच ‘अशोक मामा’ म्हणू लागला आणि त्याचं पाहून इतरांनी सुरुवात केली. आता सगळेच ‘मामा’ म्हणतात. त्यात प्रेमाचा ओलावा आहे.’
नाटकातून केली अभिनयाची सुरुवात
अशोक मामा यांनी पहिल्यांदा लोकप्रिय मराठी लेखक विष्णू सखाराम खांडेकर यांच्या ‘ययाति’ पुस्तकावर आधारित नाटकात काम केलं. त्यांनतर त्यांनी अनेक नाटकं केली. त्यातून यश मिळायला लागल्यावर त्यांनी त्यांचा मोर्चा सिनेमांकडे वळवला. त्यांना निर्मात्यांकडून सिनेमाच्या ऑफर येऊ लागल्या. मनोरंजन क्षेत्रात काम करत असतानाही त्यांनी बँकेतली नोकरी सोडली नाही. जवळपास १० वर्ष त्यांनी अभिनय क्षेत्र सांभाळत नोकरी केली आणि नंतर ती सोडली. किती होता बँकेतला पहिला पगार
मामांना बँकेत महिन्याला २३५ रुपये पगार होता. मिळालेल्या या पगारातील २०० रुपये ते घरी द्यायचे. उरलेल्या ३५ रुपयांत ते आपला महिन्याचा खर्च भागवायचे. विशेष म्हणजे वेगवेगळे सिनेमे पाहायला मिळावे यासाठीही ते ३५ रुपयांमध्ये बचत करायचे. बँकेच्या शेजारी असलेल्या हॉटेलमध्ये १० पैशांना पाव मिळायचा आणि १५ पैशांची पातळ भाजी मिळायची. हेच त्यांचं दुपारचं जेवण असायचं. #सत्यप्रभा न्यूज # नांदेड
